Na inauguración da Exposición Fotoxénica-Mente II leranse uns textos que amosarán a importancia de promover a saúde mental entre as persoas novas para previr e tratar precozmente as enfermidades mentais, e aproveitarase tamén para facer entrega de premios aos autores das fotografías gañadoras.
O segundo Certame Fotoxénica-Mente foi convocado pola Asociación Albores o pasado 10 de outubro de 2018, Día Mundial da Saúde Mental. O tema do concurso foi a saúde mental e a mocidade, seguindo a liña da Organización Mundial de Saúde que dedicou o Día Mundial da Saúde Mental 2018 á xente nova. A mostra fotográfica, que visitará os institutos da zona durante os vindeiros meses, irá acompañada de obradoiros para o alumnado. Os obxectivos que se perseguen con esta dobre actuación son ofrecer unha formación en temas relacionados coa saúde mental e fomentar a prevención e detección precoz das enfermidades mentais na xente nova.
Trátase dun acto de aforo limitado ao que están invitadas as persoas participantes do concurso, os axentes políticos, o equipo directivo e o claustro do profesorado do instituto, o usuariado de Albores, as súas familias e os medios de comunicación con carácter preferente. Se alguén tivese especial interese deberá confirmar presenza enviando un correo electrónico a albores@albores.org
A Asociación Albores é unha entidade sen ánimo de lucro que traballa dende o ano 1999 para a asistencia e mellora da calidade de vida das persoas con enfermidades mentais crónicas e as súas familias. Conta con dous centros de rehabilitación psicosocial e laboral en Monforte de Lemos e Chantada.
