EFE.- Axentes da Comisaría de Monforte de Lemos investigan as circunstancias do misterioso caso dun tractor que apareceu este xoves pola tarde, coas chaves postas, no mesmo lugar no que fora roubado en xuño do 2016.

Fontes policiais confirmaron a EFE que, de momento, a investigación “continúa aberta” e non se descarta ningunha hipótese, tendo en conta o estraña que resultou a desaparición dun vehículo agrícola desa envergadura e agora a súa aparición no mesmo lugar.

Precisaron que o tractor, valorado no seu momento nuns 60.000 euros, foi roubado do recinto dun establecemento comercial situado na estrada de Chantada, en Monforte de Lemos.

Onte pola tarde, o vehículo aparecía, case no mesmo lugar, pero fóra do recinto, coas chaves postas, e con algunhas modificacións no frontal.