As proxeccións terán lugar todos os venres ás 20.00h no Ateneo Casino de Monforte de Lemos, unha cita semanal estable para as persoas afeccionadas ao cine. As sesións serán gratuítas e abertas ao público ata completar aforo.
Esta primeira serie de sesións ofrecerá unha programación variada e plural en xéneros e estilos, como terror, animación e fantástico, comedia, drama e cine clásico, co obxectivo de chegar a públicos diversos e fomentar unha mirada crítica e curiosa sobre o cinema.
Ademais, o cineclube aposta tamén pola conciliación e a formación de novos públicos, polo que está prevista a realización de sesións dirixidas ao público familiar dous sábados ao mes, cunha selección de películas pensadas para ver en familia
Co apoio a esta actividade, o Ateneo Casino reforza os seus obxectivos como entidade cultural, comprometéndose co tecido cultural de Monforte de Lemos e posibilitando o encontro a cidadanía arredor da cultura, entendida como espazo de diálogo, reflexión e convivencia.
