A campaña destaca o inverno como un momento privilexiado para descubrir a Ribeira Sacra desde unha perspectiva máis íntima e auténtica, afastada das aglomeracións, favorecendo o contacto coa natureza, o patrimonio e a cultura vitivinícola da zona.
“O inverno permite descubrir a Ribeira Sacra cunha calma especial, gozar do viño sen présas e conectar co territorio dun xeito máis profundo”. Con esta acción, a Ruta do Viño reforza o seu compromiso coa promoción dun destino que combina tradición, calidade e autenticidade durante todo o ano.
A Ruta do Viño Ribeira Sacra aposta así por desestacionalzar este itinerario enoturístico promovendo experiencias de calidade, como visitas a adegas, catas comentadas, propostas gastronómicas adaptadas á tempada invernal e actividades culturais.
Así, promociona a oferta de calidade que ofrecen as mais de corenta entidades enmarcadas nesta Ruta do Viño Ribeira Sacra (adegas, museos do viño, aloxamentos, restaurantes, elementos patrimoniais, enotecas e entornos naturais), que procuran unha experiencia única para os visitantes e garanten un estándar de calidade.
actividades promocionais
As primeiras actividades desenvolveranse este sábado, 31 de xaneiro, en dúas adegas de referencia na Ruta do Viño da Ribeira Sacra:
“O inverno que a viña conta” de 10:00h a 14:00h, na adega Vía Romana (Chantada), recentemente recoñecida como Mellor Destino Enoturístico na guía Galicia Report Top 100 2026. Proponse un itinerario inmersivo a través da cultura do viño centrada no inverno con accións participativas, cata de viños especiais, degustación gastronómica de tempada e intervencións musicais.
“Escaparate de sabores e sons” de 17:00h a 21:00h, en Adega Vella (A Teixeira), que ten recibido numerosos recoñementos, destacando os seus viños 1904, 988 Godello e Quitapesares, frecuentemente galardoados pola súa calidade en elaboracións de brancos e tintos en barrica. Neste escaparate de inverno na Ribeira Sacra contarase con visita guiada á adega; cata de viños selección, degustación de gastronomía de inverno e concerto.
INSCRICIÓNS ABERTAS EN ribeirasacradeinverno@gmail.com
