A Deputación de Lugo vén de informar que mantén cortadas este martes 3 de xaneiro seis estradas provinciais e que conta con preto de 90 afectadas pola neve na montaña. Ademais, os efectos da intensa e persistente choiva caída entre a noite e a mañá obrigou á institución provincial a pechar por asolagamentos a LU-P-3204 en Monforte; a LU-P-4703 na Pobra do Brollón; e a LU-P-0901 en Bóveda.
Segundo informan os técnicos, a circulación estase vendo afectada en toda a rede provincial e, por zonas, a cota de neve baixou aos 500 metros. Nese sentido, a peor parte das nevaradas está a afectar á comarca da Montaña, sendo os concellos máis afectados no sur de Lugo: Folgoso do Courel, O Incio, Quiroga, Ribas de Sil, Samos e Triacastela. Nas zonas máis altas destes municipios fálase de que hai acumulada entre 10 e 20 centímetros de neve.
Ademais, en Pedrafita do Cebreiro a circulación na LU-P-1301, que é a que conecta este concello con Seoane de Courel, estivo interrompida á altura de Pacios pola caída dunha árbore, aínda que pola tarde quedou xa expedita e libre para a circulación.
OPERATIVO INVERNAL DA DEPUTACIÓN DE LUGO
O operativo invernal mobilizado contaba este martes con 48 operarios e 26 máquinas e vehículos: 10 quitaneves, 8 pick ups con cuña e saleiro, e 8 vehículos todoterrenos para resolver as diferentes incidencias.
Estes medios foron fundamentais, refire a institución provincial, para garantir o transporte escolar e abrir paso ao persoal dos servizos sociais, que en moitos casos levaban comida a domicilio para persoas maiores que viven na montaña
