En Sober adxudicouse á empresa Fevisa Vías y Obras SL a mellora de sete quilómetros ao inicio da LU-P-5903, que é a estrada que conecta este municipio con Doade “unha vía fundamental para a Ribeira Sacra polo que supón tanto para o turismo como para o sector vitivinícola”, sinala o deputado de Promoción Económica e Social, Pablo Rivera Capón.

Cun prazo de execución de 2 meses, rehabilitarase o primeiro tramo da vía: desde o quilómetro 1,3 ao 8. Os traballos consistirán na reapertura de cunetas, saneo da explanada, reparación de desperfectos e repavimentación.

Avanzou o Deputado Provincial que estas obras “terán un impacto moi importante, porque esta vía dá acceso a miradoiros, adegas e explotacións de viño, sendo unha infraestrutura clave para o desenvolvemento da economía local. En base a esa importancia, levamos investidos máis de 700.000€ nesta estrada nos últimos seis anos”.