A circulación ferroviaria entre Montefurado e San Clodio, no tramo Monforte de Lemos-Ponferrada, restableceuse tras permanecer interrompida desde este mércores 18 de febreiro por mor dun enganchón do pantógrafo dun tren coa catenaria. Así o confirmou o Administrador de Infraestruturas Ferroviarias (ADIF), quen asegurou que a incidencia xa quedara solucionada este xoves 19 de febreiro.
Fontes de Renfe sinalaron que o tren afectado por esta incidencia foi o Rexional que cubría a ruta Ponferrada-Ourense. Os viaxeiros tiveron que ser evacuados e trasladados, coa axuda dos GES de Quiroga, axentes da Garda Civil e traballadores de ADIF, por camiños e pistas na parroquia de Montefurado ata poder acceder á N-120.
A incidencia deuse no tramo que une as estacións de Montefurado e San Clodio. Concretamente foi pasado o túnel ferroviario que hai onde o coñecido Túnel de Montefurado e practicamente á altura da aldea do Ivedo.
Ademais, a interrupción da circulación neste punto obrigou a desviar por outro itinerario cara a León o Alvia A Coruña-Barcelona. Neste caso, os viaxeiros de paradas intermedias son trasladados por estrada.
UNHA INCIDENCIA O DÍA ANTERIOR
Curiosamente, o martes 17 de febreiro declarouse un incendio na infraestrutura ferroviaria, e dentro dun túnel próximo ao suceso devandito, incidencia que mantivo cortada desde primeira hora da mañá a liña entre Montefurado, no concello de Quiroga, e Monforte de Lemos.
