Macías, nado en Ferrol no 1949 e vinculado á construción naval, cando se xubila comeza a transformar o tempo libre en pezas que representan edificacións características principalmente da costa ferrolá, con especial atención ao gran patrimonio modernista da cidade, a través da obra de Rodolfo Ucha Piñeiro. Recrearía tamén faros, ermidas, dornas….

A maioría dos traballos a exposición están feitos con produtos reciclados e ferramentas que calquera pode ter en casa, deste xeito a creatividade adquire protagonismo nesas pezas, que recrean para o visitante o legado do mestre do Modernismo, Rodolfo Ucha Piñeiro. Edificios que comparten o día a día da cidade xunto a obras que xa só perviven no recordo duns poucos.

As maquetas de Macías mostráronse en lugares como a Feira do Modernismo de Barcelona, a de León ou a Feira de Turismo de Silleda. Elaborou maquetas expresamente para a exposición “Ferrol Vello, o barrio do que todos somos veciños”, e cedeu pezas tamén para distintas exposicións e mostras nas Oficinas de Turismo de Ferrol, Ateneo Ferrolán.

En Chantada, Macías “séntese emocionado de poder compartir estas pequenas creacións, que brotan do seu corazón a través das súas mans”. A mostra pode visitarse en horario de 10:00h a 14:00h e de 16:00 a 20:00 de luns a venres e os sábados de 10:00h a 14:00h.