Na edición número XI do pasado ano, aos premios económicos que reciben os tres proxectos gañadores (1º Premio de 10.000€ para O FOGAR DOS SOÑOS / 2º Premio de 6.000€ para ENSÁCRATE / 3º Premio de 4.000€ para VIÑALERT), engadiuse para os 10 finalistas a posibilidade de acceder a un programa de asesoramento estratéxico que conta coa financiación de AGADER.
Con este bono de asesoramento o Concurso e Proxectos Empresariais Semente Ribeira Sacra dá un paso máis para fortalecer a viabilidade e sustentabilidade dos proxectos finalistas a través dun acompañamento especializado en distintas áreas:
- Mentoría personalizada: Para guiar aos emprendedores nos seus desafíos estratéxicos e operativos.
- Asesoramento en modelos de negocio sostibles: Para estruturar proxectos con bases sólidas e escalables.
- Xestión financeira e acceso a financiamento: Para mellorar a administración de recursos e explorar oportunidades de investimento.
- Taller grupal de networking e creatividade: Para fomentar a colaboración e xerar sinerxias entre os emprendedores.
O bono de asesoramento deséñase baixo un enfoque práctico e personalizado, asegurando que cada emprendedor reciba apoio en función do seu nivel de desenvolvemento e sector de actividade. A combinación de sesións individuais e grupais garante un equilibrio entre a formación técnica e a creación de redes de apoio, fundamentais para a consolidación de negocios en contornas rurais.
Da presentación da actividade que se desenvolverá durante catro meses, combinando encontros presenciais e online, participaron a directora xeral de Agader, Mª Paz Rodríguez Rivera; un dos técnicos que imparte a formación por parte de EOSA, Javier Germade e en representación da Asociación Semente de Monforte que promove o Concurso de Proxectos Empresarais e esta formación, a presidenta, Pilar López
Presentación Bono Semente / Concurso de Proxectos Empresarais Semente Ribeira Sacra
