A presentación oficial do percorrido de La Vuelta Femenina by Carrefour.es terá lugar este luns, 9 de marzo, ás 19.00 horas, no Auditorio Municipal de Ribeira (A Coruña). A cuarta edición desta ronda feminina terá a súa saída oficial en Galicia o vindeiro 3 de maio e, tal e como avanza o rexedor, Monforte será protagonista da 4ª Etapa, que sairá da cidade do Cabe o mércores, 6 de maio, percorrendo o centro urbano.
“A saída estará situada na Praza da Compañía e continuará pola rúa Cardenal, Avenida de Galicia, Ronda María Emilia Casas Baamonde, Doctor Casares saída da cidade pola rúa Morín”, detalla o Alcalde. A etapa terá unha distancia de 115,2 quilómetros, cunha elevación de 304 metros en relación con Monforte. Tras saír da cidade do Cabe, percorrerá as localidades de Sarria, Láncara, Páramo, Portomarín, Ventas de Narón, Taboada e Monterroso para rematar en Antas de Ulla. A meta estará situada no Parque Central de Galicia, no punto identificado como o centro xeográfico de Galicia.
O alcalde, José Tomé, destaca o alto impacto deportivo e mediático a nivel internacional deste evento deportivo, unha cita xa consolidada no calendario do ciclismo feminino: “Terá cobertura en 190 países, incluíndo canais xeneralistas e canais temáticos deportivos, 18 emisoras en directo, 3 axencias de noticias e diferentes páxinas web nacionais e internacionais. Estamos falando dunha cobertura que abarca case todos os recunchos do planeta”. Así mesmo, agárdase presenza ‘in situ’ de xornalistas especializados de 9 nacionalidades: Brasil, Francia, Italia, Colombia, República Checa, Portugal, Países Baixos, Polonia e España.
A retransmisión en España será a través de RTVE, e para toda Europa en Eurosport. Na edición de 2025, lembra o Alcalde, emitíronse en directo por Teledeporte todas as etapas e acreditáronse un total de 112 xornalistas de 66 medios de comunicación. As previsións de La Vuelta para esta edición son semellantes.
A cidade do Cabe volverá ter protagonismo no ciclismo nacional e internacional 8 meses despois de acoller a meta da 15 Etapa de La Vuelta, o pasado 7 de setembro de 2025. O alcalde, convida aos monfortinos e monfortinas a saír novamente ás rúas o 6 de maio para desfrutar dun evento deportivo destas características.
