O deputado do BNG Iago Suárez denunciou este mércores no Parlamento galego que a Xunta non realizou traballos de contención do monte nin de restauración hidrolóxico-forestal nas zonas afectadas polos incendios forestais de 2025 no municipio lucense de Pantón. Nunha pregunta dirixida á conselleira do Medio Rural, María José Gómez, o parlamentario nacionalista acusou ao Goberno galego de incumprir o acordo adoptado na Comisión 7ª da Cámara para actuar nestes terreos tras os lumes.
“Esperábase que a Xunta estivese presente cando o territorio arde e cando ten que facer os traballos de restauración e vostedes non o fixeron”, reprochou Suárez, que tamén criticou que o Executivo autonómico “use a Ribeira Sacra como un parque temático”. Na súa réplica, a conselleira defendeu a actuación da Xunta nas zonas afectadas polos incendios do pasado ano e reivindicou o traballo realizado.
“Se algo caracterizou a este Goberno durante 2025 foi a rapidez e planificación coa que se actuou desde o primeiro momento”, asegurou Gómez. A responsable de Medio Rural enumerou distintas actuacións relacionadas coa estabilización do solo, a redución da erosión e a recuperación das infraestruturas forestais danadas polos incendios.
