O concello de Monforte vén de anunciar a construción dunha rede de caniles coa creación de catro espazos verdes para mascotas en catro zonas da cidade, co fin de que todos os veciños e veciñas de Monforte que teñen cans dispoñan de instalacións deste tipo a unha distancia non superior a 1 quilómetro desde a súa residencia. Os parques estarán situados nas zonas de Covas-Pinguela, Florida, Estación e Hospital.

O alcalde, José Tomé Roca, destacou que cuestións como o medio ambiente e o benestar animal son prioridades na folla de ruta do seu Goberno. “Ante unha poboación de cans en clara tendencia ascendente, unha rede de caniles na cidade convértese nunha necesidade”, apuntou o Alcalde. Estes caniles permitirán que os animais poidan realizar actividades físicas con regularidade, “evitando así que se estresen, enfermen ou se desestabilicen emocionalmente, dado que un can non debe permanecer atado ou confinado durante moito tempo, porque necesita socializar con outros cans para evitar problemas de conducta”.

O primeiro canil situarase no parque de Covas-Pinguela, nunha parcela de arredor de 1.300 m2, unha superficie, indicou o alcalde, “máis grande que a do canil da Milagrosa, en Lugo”. Así mesmo, avanzou que o Equipo de Goberno intentará que todos os caniles teñan unha superficie similar. Esta zona será a primeira porque o Concello xa dispón dos terreos necesarios para a súa instalación. “Os tres restantes iranse construíndo na orde na que se vaian conseguindo os terreos necesarios”, indicou Tomé.

Os caniles estarán dotados cunha zona de exercicios con elementos específicos de túnel, eslalon e balancín, e contarán con zonas de céspede mantido por un sistema de rego por difusión e aspersión, xabre compactado, solado con loseta de granito e un espazo para o aseo das mascotas composto por unha bañeira, mesa e fonte bebedeiro. Ademais, contarán con mobiliario de espera e descanso para os usuarios tanto cuberto como descuberto.

O primeiro paso é a incorporación dos remanentes que irán a pleno o vindeiro 30 de marzo. “Unha vez aprobados definitivamente licitarase a redacción do proxecto por un importe de 150.000 euros, aínda que a adxudicación poderá ser inferior en función das ofertas presentadas”, explicou. <z“O meu compromiso é que este mesmo ano estea en obras a primeira instalación, e que cada ano sexa construída unha nova, de tal modo que, en 3 anos, teremos construídos e en servizo os 4 caniles nas 4 zonas da cidade cun inventimento de 600.000€”.