No marco do programa, este domingo pola tarde entregáronse os premios dos concursos de traxes medievais e decoración de balcóns e establecementos convocados polo Concello de Monforte co obxectivo de dinamizar e potenciar a participación neste evento. Establecíanse tres certames independentes aos que se destina unha contía máxima de 3.200€: X Concurso de Decoración de Balcóns, o XI Concurso de Decoración de Establecementos Comerciais e Hostaleiros, e o XIII Concurso de Traxes Medievais.

Na tarde deste domingo, o alcalde de Monforte, José Tomé Roca, acompañado da Tenente Alcalde, Gloria Prada, fixo entrega dos premios e agradeceu a participación de todos os inscritos e felicitou aos gañadores. A finalidade destes concursos, indica Tomé Roca, “é animar aos monfortinos e as monfortinas, así como aos visitantes a implicarse na Feira Medieval e ser protagonistas activos da mesma, xa que a súa colaboración é unha parte fundamental do éxito que acadamos ano tras ano con esta

No X Concurso de Decoración de Balcóns tanto a temática como o deseño da decoración teñen que ser acordes coa época medieval, e na valoración tivéronse en conta criterios como a imaxinación, a idea, a estética, a orixinalidade e os materiais utilizados.

• 1º PREMIO (200€): Local social A Pinguela, a cargo da Asociación Veciñal A Pinguela.
• 2º PREMIO (150€): AFAMON, Asociación de familiares de persoas con Alzheimer, rúa Doctor Casares.
• 3º PREMIO (100€): José Antonio Dávila Rodríguez. Ribasaltas.
• Accésit (50€): Asociación Española Contra o Cancro de Monforte. Cardeal, 15.

No XI Concurso de Decoración de Establecementos Comerciais e Hostaleiros, o obxectivo é premiar aos establecementos de Monforte coa mellor ambientación medieval, e así incentivar a participación dos sectores do comercio e da hostalaría na ambientación e nos actos organizados para a Feira Medieval. Valorouse a imaxinación, a idea, a estética, a orixinalidade e os materiais utilizados.

• 1º PREMIO (300€): Carpe Diem.
• 2º PREMIO (200€): Chuladas y más.
• 3º PREMIO (100€): O Salgueiral.
• Accésit (50€): Liliana Margarita.
• Accésit (50€): Pizzería Versalles.

O obxectivo do XIII Concurso de Traxes Medievais é premiar os mellores traxes medievais que luzan os participantes inscritos, e así incentivar tanto nos monfortinos e nas monfortinas coma nos visitantes, a participación e a ambientación nos actos organizados con motivo desta festa de recreación histórica.

Feira Medieval 2026 / Concello de Monforte

ADULTOS:

• Individual:

• 1º PREMIO (100€): Julita Berreiro Cano.
• 2º PREMIO (75€): Rebeca Galván Segura.

• Parellas (2 compoñentes):

• 1º PREMIO (200€): Montserrat Varela Ons e Asier Castro Varela-Ons.
• 2º PREMIO (175€): Esther Fraile Hernández e Raúl Pérez Hernández.

INFANTIL (ata 12 anos):

• Individual:

• 1º PREMIO (100€): Sol Galván Segura.

• Parellas (2 compoñentes):

• 1º PREMIO (150€): Mateo e Leo Díaz Uceira.
• 2º PREMIO (100€): Ana e Elisa López Pérez.

Trala entrega de premios, continuou o programa de actividades co desfile do Gran Dragón polas rúas do burgo medieval e o espectáculo Vulcano, unha actuación de danza e lume na Praza de San Antonio que pechou a edición máis multitudinaria da Feira Medieval de Monforte. O rexedor destaca que a celebración “levouse a cabo sen ningún tipo de incidencia salientable, o que é moi importante tendo en conta que foi multitudinaria, con milleiros de persoas, tanto de Monforte como de visitantes, que encheron a cidade”. Neste senso, Tomé Roca quere agradecer a implicación da veciñanza na celebración que se desenvolveu acompañada dunha excelente climatoloxía: “Acompañou o tempo e acompañaron os monfortinos e monfortinas que se implicaron co evento saíndo cos traxes de época e participando de todas as actividades que tiñamos programadas”, indicou.

Espectáculos como as xustas de cabaleiros no campo de terra dos Escolapios, os pasarrúas con música e personaxes fantásticos, as actuacións na Praza de España ou desfile do Gran Dragón acadaron unha importante afluencia de público, con especial mención ao desfile de antorchas e solta de faroliños en San Vicente. “A xornada do sábado foi espectacular desde o momento da inauguración pola mañá ata a noite, que pechamos coa solta dos faroliños en San Vicente, que ademais foi un acto tremendamente emotivo e moi bonito”, indica o Alcalde. “Tamén o domingo foi moi especial, con animación de rúa que mantivo moi bo ambiente durante toda a xornada”, engade.

“Un éxito como o que acabamos de vivir non fai mais que animarnos a continuar traballando por Monforte e por esta Feira Medieval que ten máis que merecida a declaración de Feira de Interese Turístico Galego, consideración que agardamos celebrar na próxima edición que será a número 23”, conclúe o alcalde.

Faroliños San Vicente Medieval 2026 / Concello de Monforte