A voceira socialista, María Dalba López, responsabiliza desta situación ao Goberno galego e reclamou “unha solución estable”. “Se é necesario establecer incentivos para facer atractiva a praza e garantir a chegada de profesionais sanitarios ao Courel, a Xunta debe facelo. O que non pode ser é que o rural quede sempre á cola e que a veciñanza pague as consecuencias da falta de planificación do Goberno galego”, censurou.

A socialista acusou ao PP de “normalizar os recortes no rural como se vivir nun concello de montaña implicase ter menos dereitos”. O Goberno de Rueda está convertendo a falta de médicos nun problema crónico porque non planifica, non inviste e non dá respostas”.

López denunciou ademais que mesmo nas semanas nas que hai persoal dispoñible para cubrir catro días de consulta “a Xunta decide manter só tres”, e que cando hai un festivo polo medio a atención redúcese aínda máis, quedando en só dous días”.

A voceira do PSdeG subliñou que esta situación responde a un problema estrutural da sanidade pública galega, marcado pola falta de investimento, a ausencia de planificación e a desigualdade territorial. “Hai un déficit estrutural de médicos e pediatras, non se garante a remuda xeracional e as substitucións chegan tarde ou directamente non chegan”, sinalou.