A coñecida como Liga Maker Drone é a primeira competición escolar do estado que propón o reto de deseñar e programar un sistema dron para darlle solución a algún problema social ou laboral actual. A deste ano será a quinta edición, celebrarase no Coliseum da Coruña e participarán 18 equipos de 2º da ESO de outros tantos institutos galegos. O desafío tecnolóxico poñerá a proba a súa creatividade, enxeño e capacidade de traballar en equipo.
Para coñecer máis detalles falamos con Pablo Blanco, coordinador da Liga Maker Drone e profesor de tecnoloxía do IES Francisco Daviña Rey, único centro que participa representando ao sur de Lugo.
O RETO DA ‘V LIGA MAKER DRONE’
O desafío formulado para este ano é programar, deseñar e construír un dron para minimizar accidentes laborais en traballos en altura que supoñen un alto risco para a vida das persoas.
Segundo nos explica Pablo Blanco, para demostrar que os sistemas aplicados ao dron fan posible que este poda realizar tarefas de mantemento en altura deseñáronse dúas probas. A unha certa altura haberá un aeroxenerador con 3 aspas e o reto consistirá en superar dúas probas nun prazo de tempo de tres minutos. Unha delas consistirá en facer voar o dron e conseguir meter un chorro de auga polo oco dalgunha das aspas, e a outra en facer que o dron enganche entre as aspas unha pequena caixa de ferramentas e baixala ao chan.
“Este ano pasáronse co reto”, afirma o profesor de tecnoloxía do IES Daviña entendendo que o desafío ten unha gran dificultade e pode xerar certa frustración se os equipos non poden superalo.
Os equipos participarán en roldas eliminatorias e os tres mellores disputarán a final. Haberá 5 premios que se outorgarán do seguinte xeito: un para o gañador da liga e os outros catro para o mellor deseño, para a solución máis disruptiva, para a mellor presentación e para a mellor pilotaxe.
Preguntámoslle ao noso interlocutor se houbo moitos ensaios para que o equipo vaia ben preparado, e afirma que si, se ben insiste en que “a pilotaxe é moi complicada porque todo é manual, non hai GPS e a estabilización é moi difícil”. “Hoxe mesmo fixemos unha proba e funcionou ben a solución que adoptamos”, engade. Insiste en que o reto é moi difícil, e máis sabendo que hai participantes que ademais da preparación da Liga Maker Drone practican durante o ano en probas de pilotaxe máis sofisticadas.
OS EQUIPOS
Segundo as normas, os equipos terán un mínimo de 7 e un máximo de 10 integrantes, distribuídos entre 6-8 titulares, 1 coordinador (profesor-titor) e un mentor (opcional). No caso do IES Daviña Rey serán 8, con 4 compoñentes principais; dous para facer a presentación do sistema que desenvolveron (portavoz e segundo portavoz); e outros dous para desempeñar as funcións de piloto e copiloto.
Os centros educativos teñen liberdade de elixir, segundo os seus propios criterios, os integrantes dos seus equipos, así como asignar entre eles as funcións de: piloto, copiloto, portavoz e segundo portavoz, responsable de deseño, etc.
Para escoller a figura do piloto e do copiloto, dinos Pablo que o monitor dá as sesións de voo previas e de aquí saen os mellor preparados: “collemos aos que máis aptitudes lle vemos”.
VALOR ENGADIDO DESTA COMPETICIÓN ESCOLAR
Esta iniciativa achega valor tanto ao centro que participa como ao propio alumnado. Para o centro, explica Pablo, esta actividade ofrécelle a posibilidade de afondar na materia de tecnoloxía e participar en actividades que complementan a formación; e ao alumnado permítelle aprender electrónica, pilotaxe, programación e mecanismos. E non só o anterior, os participantes fomentan a creatividade e o enxeño ademais de aprender a ser disciplinados e traballar en equipo.
A Liga Make Drone é un proxecto da Fundación Barrié e o ITG Centro Tecnolóxico.
