A exhibición que inicialmente estaba previsto que tivera lugar na Explanada da Compañía, desprazouse ao Pavillón Polideportivo da Pinguela, pola chuvia e foi acollida con gran expectación por parte do público. Desde as 10.00 e ata as 13.00 horas, foron moitos os monfortinos e monfortinas os que se achegaron para coñecer de preto o traballo que realizan estes profesionais, así como o material e equipamento que empregan nas súas misións.
Neste senso o alcalde agradece a toda a cidadanía que acudiu a este evento o interese amosado, “e especialmente aos equipos directivos e persoal docente dos centros educativos da cidade, pola súa implicación e esforzo, organizando visitas do alumnado á exhibición, na que os escolares puideron coñecer de certa o traballo deste corpo militar”.
O alcalde visitou a exposición e acompañado polo Coronel da Guardia Real e o Tenente Coronel do Grupo Mixto, presidiu o acto institucional no que se realizou o izado da Bandeira Nacional e se recitou o ideario da Guardia Real. Neste acto, o Coronel da Guardia Real e o Alcalde intercambiaron agasallos en lembranza desta xornada. Posteriormente celebrouse exhibición da sección de movementos floreados da Guardia Real. A exposición incluíu unha pista de obstáculos infantil, unha estación de transmisións de radio, uniformidades oficiais da Guardia Real, armamento, material de seguridade, exposición de drons de seguridade, material contraincendios da Guardia Real e varias motocicletas Harley Davidson. No exterior do Pavillón exhibíronse cabalos de pura raza española e hispanobretóns e peza de artillería.
O rexedor trasladou aos efectivos da Guardia Real o seu agradecemento pola visita a Monforte e lembrou “a nosa cidade xa acolleu en 2023 un acto vinculado ás Forzas Armadas, concretamente unha Xura de Bandeira civil que se desenvolveu nunha xornada moi emotiva e recordada por moitos veciños”. Nesta ocasión, engadiu, “temos novamente a oportunidade de coñecer máis de certa o traballo da Guardia Real e os valores de entrega, profesionalidade e respecto que representan”.
Guardia Real Monforte / Concello de Monforte
