O nacionalista critica a ausencia dunha normativa específica en Galicia para este tipo de instalacións, denunciando que o goberno de Rueda “dá o visto bo a que se poñan onde queiran, como queiran e de calquera maneira”. Suárez reprochou ao director xeral de Planificación Enerxética, que a Consellería “non teña plan de incendios, non defina distancias de seguridade, non explique o uso da auga para refrixeración e nin sequera prevexa un plan de evacuación para a veciñanza”.
Destaca tamén o impacto visual e patrimonial sobre a igrexa de Santa María de Pesqueiras, “unha xoia do románico” situada na Ribeira Sacra, que aspira a ser Patrimonio da Humanidade. “Ou flauta ou gaita: non se pode pedir a declaración e ao mesmo tempo autorizar unha planta de litio bordeando ese territorio”, sentenciou.
Suárez acusou o Goberno de Rueda de converter Galicia “nunha terra de sacrificio ao servizo das multinacionais, cun modelo servil aos designios de Madrid” e retou a que o representante da Xunta se reúna cos veciños de Pesqueiras para explicarlles “cara a cara cal é a opinión e o futuro que reserva a Xunta a esta parroquia. Vostede é un cargo político, non un simple técnico. Está en disposición de recibilos?”, preguntou
