“O día 14 de xullo de 2022 comezaba a arder a serra do Courel e o 17 de xullo, de noite, comezamos a gravar. Non sabiamos que chegabamos no peor do incendio, na fatídica xornada do domingo na que o lume adquiriu dimensións decoñecidas ata entón en Galicia”.

O Son da Serra, Cando O Courel derramou bágoas de cinsa é un documental sobre a Serra do Courel e o incendio que padeceu no verán do 2022. Este incendio foi a presentación en Galicia dos incendios convectivos de sexta xeración. Durante dúas semanas arrasou case 13.000 hectáreas, principalmente nos concellos de Folgoso do Courel, A Pobra do Brollón e Quiroga, obrigando a desprazar a máis dun milleiro de persoas no que era o maior incendio da historia de Galicia ata que chegou agosto do 2025.

A longametraxe documental dalgo máis dunha hora de duración recolle o resultado das entrevistas que se comezaron a gravar cando o incendio aínda non se dera por extinguido e cando as emocións e o medo estaban moi presentes. Seguiuse coas entrevistas ata comezos do 2025. Entre as voces das persoas que viviron o incendio do Courel do 2022 atópanse as veciñas e veciños, rexedores locais e unha representación do servizo de extinción de incendios da Dirección Xeral de Defensa do Monte, que facilitou importantes imaxes deste incendio.  

O documental é froito da colaboración de Némesis Audiovisual co fotógrafo, Emilio Romanos Castiñeira, coa dirección de Ana Belén Fernández Fernández e Pau Fierro Cadórniga e a BSO de Ale González. O traballo que se presentaba a finais do pasado ano aos seus protagonistas en Folgoso do Courel estase levando desde entón en certames de temática ecolóxica e etnográfica.

O venres, 15 de maio, ás 20:15h, proxectarase en Multicines Hollywood de Monforte con entrada libre e gratuíta ata completar aforo. Ao día seguinte, o sábado, 16 de maio, desde as 19:00h celebrarase no Ateneo Casino un coloquio, aberto ás persoas interesadas. Agradécese a colaboración do Cineclub Ateneo para acoller este encontro, no que se dará conta de próximas proxeccións e debates sobre o documental que se levarán a cabo coa colaboración da área de Cultura da Vicepresidencia da Deputación de Lugo.

O Son da Serra, cando o Courel derramou bágoas de cinsa aséntase en tres piares fundamentais:

• Documentación videográfica para deixar constancia na historia dunha das maiores riquezas medio ambientais e etnográficas de Galicia, que intentan manter as persoas que viven e traballan alí cada día coidando dun territorio que de non ser por elas estaría condenado ao abandono e ao incendio definitivo.
• Sensibilizar, trasladar á veciñanza da serra o importantes que son na conservación deste espazo e sensibilizar ao resto da cidadanía sobre a singularidade dun territorio único. Hai cousas que se se perden, perderiamos tod@s moito.
• Informar, dar conta do que significan este tipo de lumes, como funcionan e incentivar a formación de profesionais que traballan nestes sectores, tamén a formación veciñal, e a creación de protocolos de coordinación entre a veciñanza e o servizo de extinción.

O Son da Serra son as voces das persoas que nos levan polo vivido naqueles días e dalgún modo, as de todas as persoas que padeceron este desastre natural e vital. Son unha homenaxe a cada veciña e veciño da serra, unha reconciliación e unha posta en valor do que este territorio significa.