Náufragos do Paradiso, anunciaba en agosto do 2023 na súa sede da Rúa Roberto Baamonde de Monforte de Lemos, que o sábado 2 de setembro celebrarían a última edición do Festival do Paradiso. O Festival que sempre se caracterizou polo seu carácter social e asociativo, e a calidade das propostas ademais da súa gratuidade volve asegurando que, “unha das cousas que mantiveron viva a esperanza deste regreso foi o cariño de moitas das persoas que asistían ano si e ano tamén á chamada do noso Paradiso particular”.
Invítannos a esta nova cita co Festival, dous poetas insignes destas terras, Manuel María e Lois Pereiro. O ilustrador monfortino LoisMan recorre aos poetas para achegarnos un cartel que mestura nostalxia e ironía, “nunha imaxe onírica coma dúas pantasmas da cultura que retornan desde o outro lado do Estigia nun pequeno bote, pero parece que algo saiu mal e acaban por quedar atrapados nunha fonte de grandes dimesións. En primeiro plano un numeroso grupo de homes observan a escena atentamente”.
Desde Náufragos do Paradiso aseguran que o instinto mantenos ca curiosidade suficiente como para non afogar de todo, “Porque o Loisón, que bautizou esta entidade sen sabelo, xa coñecía a cara B do Dark Side of The Moon moito antes de que a Artemis II tentase calar sen éxito as voces de terraplanistas e novos inquisidores. Porque o canto do Carro do poeta da Xistral, Manuel María, inda se pode escoitar nos corazóns vellos e novos de máis dun náufrago”.
A xornada do 23 de maio no Ateneo Casino comezará ás 19:30h con Micro Aberto. Ás 21:30h haberá un Descanso para ás 22:30h proxectar a curtametraxe 10 Anos de Paradiso. Posteriormente terán lugar os concertos, actuando ás 22:45h Ünder & Diego Flâneur e ás 00:30h Monoulious DOP
As actividades son gratuítas e invitan a participar “aos nostálxicos, aos vividores, aos frikis que consideran que os froitos da Comarca tamén deben ser desfrutados polos orcos desta nova Mesopotamia, ás mariñeiras e mariñeiros do interior, aos visitantes de dimensións descoñecidas e demáis criaturas. Porque desta volta o Paradiso non pode esperar. Subes a bordo?”.
