Segundo explicou o deputado do BNG, Iago Suárez Fernández, o proxecto previsto suporía unha transformación moi importante dunha das zonas máis emblemáticas da cidade. “O proxecto contempla ramplas de acceso de ata case tres metros de altura que alterarían completamente a beira do río e introducirían elementos alleos á súa contorna natural. Estamos ante unha actuación de enorme impacto e claramente desproporcionada”, sinalou Suárez.

O parlamentario nacionalista destacou que existen alternativas para limitar ou eliminar o tráfico rodado pola ponte medieval sen necesidade de executar unha infraestrutura desta envergadura.

Iago Suárez tamén puxo en valor o traballo da plataforma Salvemos O Malecón, que alertou desde o comezo das consecuencias desta actuación e reclamou unha reflexión máis profunda sobre o futuro do Malecón. “O Malecón e a contorna do Cabe forman parte da identidade de Monforte. As administracións teñen a responsabilidade de protexer este patrimonio colectivo e de escoitar á veciñanza antes de adoptar decisións que poden ser irreversibles”, subliñou.

Desde o BNG lembran que a autorización da Dirección Xeral de Patrimonio resulta determinante para a execución do proxecto e consideran que a Xunta debe reavaliar a súa posición para garantir a preservación dun dos espazos máis representativos da cidade. A iniciativa será debatida proximamente no Parlamento de Galicia.