Durante o acto de graduación celebrado no IES Francisco Daviña Rey tivo lugar a entrega dos diplomas ao alumnado dos distintos ciclos formativos impartidos no centro, entre os que se atopan os ciclos das familias de Servizos á Comunidade, Sanitaria, Transporte e Mantemento de Vehículos e de Electricidade e Electrónica. “Foi unha ocasión para poñer en valor o esforzo, a constancia e o compromiso demostrados polos estudantes ao longo da súa formación”, sinalan dende o cento de ensino monfortino.
A graduación serviu tamén para destacar os excelentes resultados académicos acadados polo alumnado do centro. De feito, tres alumnas e un alumno do ciclo superior de Educación Infantil foron recoñecidas/os entre os 16 mellores expedientes de Formación Profesional da provincia de Lugo, “un logro que constitúe un motivo de orgullo para toda a comunidade educativa e que reflicte o alto nivel de preparación e dedicación do alumnado e do profesorado”, trasladan dende o IES Daviña Rey.
Nas intervencións realizadas ao longo do acto salientouse a importancia da Formación Profesional como unha opción educativa de excelencia, cada vez máis demandada e cunha estreita conexión coa realidade social e laboral. Tamén se puxo en valor a colaboración das empresas e institucións que acollen ao alumnado durante os seus períodos de formación práctica, contribuíndo de maneira decisiva á súa cualificación profesional.
ORGULLO POLO ALUMNADO E COMPROMISO POR UNHA FP DE VALOR
Dende o IES Francisco Daviña Rey, amosando a lóxica satisfacción e orgullo, trasladaron parabéns para o alumnado que se graduaba e, de xeito especial, ao que foi distinguido polos seus expedientes académicos. Dende a comunidade educativa do centro poñen en valor tamén o seu propio “compromiso cunha FP de calidade, innovadora e orientada ás necesidades da sociedade e do tecido produtivo da contorna”.
