A vitoria de Miguel Arias, que devolve o squash monfortino á elite máster, ten ademais un valor especial tanto polo nivel do torneo como pola traxectoria recente do deportista. Despois de varios anos afastado da competición debido á falta de instalacións en Monforte tras o peche do Artai Squash Club, Miguel regresou ás pistas coa reapertura dunha cancha de squash no ximnasio AB Fitness e fíxoo da mellor maneira posible: levantando un título internacional.
O monfortino completou un campionato practicamente perfecto. Na fase inicial venceu con autoridade por 3-0 a Pedro Ríos, de Fuengirola e cabeza de serie número 4, e posteriormente impúxose tamén por 3-0 a Francisco Pérez, de Xerez da Fronteira.
Xa na xornada do sábado chegou unha das vitorias máis destacadas do torneo ao derrotar por un contundente 3-0 ao polaco Bartłomiej Wojtunik, cabeza de serie número 1 e máximo favorito ao triunfo final. Pouco despois superou tamén por 3-0 ao xogador local Carlos Veiga, asegurando así o seu pase á gran final.
No encontro decisivo, disputado o domingo 14 de xuño, Miguel Arias enfrontouse a Miguel Gómez, de Xerez. Nun partido de gran intensidade e alto nivel técnico, o xogador monfortino impúxose por 3-1, proclamándose campión do Spanish Masters Internacional e culminando unha actuación que pode cualificarse de auténtico éxito deportivo.
RECUPERACIÓN DO SQUASH MONFORTINO
Máis alá do resultado, o triunfo de Miguel Arias representa tamén a recuperación do squash competitivo en Monforte de Lemos. A volta á actividade dalgúns dos xogadores históricos da cidade demostra que este deporte segue mantendo unha importante base de afeccionados e practicantes que non renunciaron a el pese aos anos sen instalacións adecuadas.
A conquista deste título internacional supón unha das mellores noticias para o squash monfortino nos últimos anos e confirma que, malia o tempo afastado das competicións, Miguel Arias continúa demostrando un nivel competitivo extraordinario, capaz de superar aos principais favoritos e de regresar á competición coroándose campión.
