Unha persoa morreu na tarde deste venres ao envorcar o tractor que manexaba no lugar de Ousende, no municipio do Saviñao.

Segundo informa o 112, fixeron falta medios de excarceración para liberar á vítima, ao quedar esta atrapada baixo o vehículo. O sinistro ocorreu pasadas as 16:45 horas, cando un particular contactou co Centro Integrado de Atención ás Emerxencias para alertar do ocorrido.

Seguidamente, o 112 alertou ao 061, á Garda Civil, a Protección Civil e aos bombeiros de Chantada. No lugar dos feitos presentáronse os servizos sanitarios e tamén se desprazou un helicóptero medicalizado con base en Ourense. Malia todos os esforzos, nada se puido facer por salvarlle a vida.