Este martes, en nota de prensa, a voceira do PP, Katy Varela, explica que tomaron esta decisión por estaren “cansos” de ver as “constantes mentiras de Tomé e do seu equipo de acólitos”, os mesmos, engadiu, “que o seguen mantendo na Alcaldía malia que a situación do alcalde o convida a marchar, en vez de aferrarse ao cargo”. Unhas críticas que volven con forza en Monforte logo de que se arquivara a denuncia por agresión sexual contra o ex conselleiro do PP, Alfonso Villares, agora delegado da Xunta en Lugo.

Nesta liña, reprochoulle ao rexedor, “que lle reste importancia á súa situación xudicial. Hai que lembrar que a causa xudicial segue aberta, que hai cinco mulleres máis citadas a declarar e que non é unha situación á que haxa que restarlle importancia; o que ten que facer é deixar o cargo e defenderse na súa esfera privada en lugar de seguir xudicializando a vida diaria do Concello”, afirma.

Do mesmo xeito, Katy Varela esíxelle a Tomé “unha rectificación” tras dicir que ambos están “na mesma situación”. “É totalmente falso”, remarcou, antes de subliñar que ela non está acusada “de presunto acoso sexual”. “Nótase que Tomé está moi nervioso, non para de dicir que todo está xa arquivado, pero a única realidade polo momento é que a investigación segue e van declarar cinco mulleres máis”, conclúe.