O Deputado de Deportes da Deputación de Lugo, Pablo Rivera Capón,  a Alcaldesa de Sarria, Pilar López Yáñez e o Tenente Alcalde, Efrén Castro, inauguraron as pistas que están situadas na rúa Castelao formando parte do complexo polideportivo do Chanto, no que tamén hai pistas de tenis e de baloncesto. Coas melloras acometidas, os veciños e veciñas de Sarria poderán practicar con total comodidade este deporte de moda nunha pista totalmente renovada.

Rivera Capón afirmou que “renovamos unhas instalacións deportivas públicas, para dotar aos veciños de Sarria de servizos de calidade como parte do noso compromiso por achegar todos os deportes aos diferentes Concellos da provincia. É grazas a ese compromiso que somos a administración galega que máis inviste en deporte por habitante no territorio lucense”.

Pola súa parte a Alcaldesa, Pilar López, agradeceu o esforzo inversor da Deputación e considerou “moi beneficiosas para os veciños de Sarria estas actuacións, xa que agora poden practicar esta actividade en calquera momento do ano, sen que a meteoroloxía o impida, algo que nos viñan demandando”.

A achega económica do Executivo Provincial foi  de preto de 46.000 euros das anualidades de 2017 e 2018.