Ao concello de Chantada, a formación pediulle que se reclamase á empresa distribuidora un informe detallado sobre as causas das avarías, a duración das interrupcións, o número de persoas afectadas, as zonas afectadas e as medidas previstas para evitar que se repitan episodios semellantes. Tamén solicitou que o Concello informase publicamente á veciñanza sobre os seus dereitos e os mecanismos para reclamar polos danos sufridos e que habilitase asesoramento municipal para as persoas afectadas.

Por Chantada pediu ademais que o Concello elaborase un informe sobre os eventuais danos ocasionados nas instalacións e servizos municipais e que, de existir prexuízos indemnizábeis, exercese as accións correspondentes para reclamar a súa reparación.

Á Xunta solicitóuselle que abrise un expediente informativo ou actuación inspectora para esclarecer as causas dos cortes e que requirise á distribuidora un informe técnico sobre as avarías, as reparacións efectuadas e os investimentos e actuacións de mantemento previstos.

Os cortes de xuño afectaron, segundo os datos recollidos no escrito presentado ante a Xunta, a arredor de 3.600 persoas abonadas, con interrupcións de varias horas e máis de nove horas acumuladas de corte en menos dunha semana para os mesmos sectores da poboación. A situación afectou vivendas, actividades económicas, servizos públicos, telecomunicacións e instalacións esenciais.

Con todo Por Chantada reclama que as administracións deixen de gardar silencio e dean conta das actuacións realizadas desde os cortes de xuño, “A veciñanza de Chantada ten dereito a saber por que quedou sen luz, se a rede que paga cos seus recibos está suficientemente mantida, que investimentos se fixeron nos últimos anos e que se vai facer para que isto non volva acontecer. E as administracións teñen a obriga de responder”.