Este venres 11 e sábado 12 de setembro celébrase a duodécima edición do festival de música folk As Cores do Outono, organizado polo Concello da Pobra do Brollón co apoio da área de cultura da Vicepresidencia da Deputación de Lugo. O programa ábrese co espectáculo deste venres 11 ás 20:30 horas na Casa da Cultura ‘Olga Novo‘. A actriz e xograresa ourensá Alba de Vales, nome artístico de Alba Grande, ofrrecerá unha proposta para todos os públicos, Unha xograría de aldea. Combinando teatro e música, indagará nas memorias aldeás e historias inspiradas nos romances de cego e contos e cantigas tradicionais.
O sábado na área recreativa de Samugueiros haberá postos de comida, bebida e artesanía que estarán abertos dende as 20:00h. Os concertos comezarán ás 21:00h con Balteira, que une a catro grandes mestres de música tradicional nun proxecto que recupera o repertorio oral galego, incorporando arranxos contemporáneos pero respectando a estrutura e a emoción das pezas tradicionais. Os cantares que sempre animaron a festa e as melodías para o baile, son o eixo sobre o que xiran os seus concertos, mantendo o espírito da foliada desde a calidade técnica e interpretativa mediante voces, percusións, acordeón e ventos.
O segundo grupo a actuar será Ialma, formado por tres pandereteiras e cantareiras acompañadas por tres músicos galego-belgas. Traerán o seu espectáculo Homenaxe, un concerto emocionante e festivo que honra as raíces galegas, a memoria e a resistencia, impulsado pola enerxía multicultural de Bruxelas.
As propostas musicais rematan ao grande con Galega de Bailables, unha formación de sete virtuosos, a maioría deles con raíces na Pobra do Brollón. A base de voces, percusión, ventos e zanfona, darán un concerto cheo de enerxía con muiñeiras, xotas e outros ritmos pensados para poñer a todo Samugueiros en pé.
Toda a programación é de entrada libre. Os detalles pódense consultar na páxina web (concellodapobradobrollon.gal) e redes sociais (Facebook @apobradobrollon e Instagram @guimaralia) do Concello da Pobra do Brollón
Xabier Díaz As Cores do Outono 2025 / Concello A Pobra do Brollón
