A cidade de Lahti, en Finlandia, acolleu o pasado 12 de setembro o Campionato do Mundo de marcha nórdica (INWA), competición na que participaba o marchista orixinario de Taboada, Alberto Fidalgo Pesquera. O destacado deportista galego competía nas distancias de 10 e 20 quilómetros quedando terceiro na absoluta desta última distancia e subcampión nas dúas dentro da súa categoría (M35).
Ao respecto destes grandes resultados, Alberto comentaba nas súas redes sociais que “do que máis orgulloso me sinto é de que o comité arbitral internacional outorgoume o premio ao marchador con mellor técnica na proba de 20 quilómetros”. E engadía, “todo isto é grazas ao tesón e esforzo dedicado día tras día en adestramentos, preparación e mellora constante”.
CRÓNICA DA SÚA PARTICIPACIÓN
O taboadés, e veciño de Oleiros, conta que a competición desenvolveuse nun circuíto de 5 quilómetros e nunha contorna de típico bosque finlandés con grandes piñeiros aos pes do lago Vesijärvi, e a carón dunhas pistas de salto de esquí. “O percorrido foi duro, con moito desnivel e grandes subidas e baixadas que comprometían a técnica. Do máis duro que fixen nunca”, explica Alberto Fidalgo ao tempo que agradece o apoio da súa muller e da súa filla “que tomaron os tempos e non deixaron de animarme”.
Os resultados de Fidalgo teñen máis valor, incluso, sabendo que participou nas dúas distancias, a de 10 e a de 20 quilómetros, unha seguida da outra. Comezou coa de 10 quilómetros e, unhas dúas horas despois de rematala, participou na de 20. O galego foi dos poucos deportistas participantes, e o único español, que dobrou a competición.
No que respecta á valoración do propio marchador, este recoñecía o seu orgullo e satisfacción: “Estou moi feliz de traer a Galicia, a Oleiros e á miña Taboada querida tantos metais e, sobre todo, de levar a Galicia polo mundo e representar a marcha nórdica da mellor maneira posible”.
