A Consellería do Medio Rural informou de que o incendio forestal rexistrado no concello lucense de Quiroga, na parroquia de Pacios da Serra, quedou estabilizado desde as 20:52 horas deste pasado xoves.

Este lume, iniciado o pasado martes ás 15:25 h, obrigou a decretar este mércores a “Situación 2” como medida preventiva. A decisión tomouse pola súa proximidade a varias aldeas, unha situación operativa de emerxencia que xa foi desactivada. Malia a estabilización aínda se atopan na zona numerosos efectivos realizando labores de saneamento do perímetro para evitar as reproducións, e durante uns días manteranse en vixiancia.

Segundo as últimas estimacións provisionais, afectou unha superficie de 420 hectáreas e para a súa extinción mobilizáronse ata o momento, de forma acumulada, 14 técnicos, 65 axentes, 79 brigadas, 53 motobombas, 8 pas, 2 unidades técnicas de apoio, 13 helicópteros e 12 avións.

A primeira hora da tarde do xoves achegábase ata o posto de mando de Quiroga o Delegado Territorial da Xunta en Lugo, Alfonso Villares. Primeiro interesouse pola situación e a evolución do incendio e despois desprazouse ata a pista de Penas Rubias onde estivo falando cos efectivos que se atopaban traballando no lugar.