Segundo explican os socialistas, ata a presentación do escrito só se celebraron dous plenos ordinarios en 2026, nos meses de abril e agosto, malia que a Corporación acordara convocalos cada dous meses, o último xoves dos meses pares. A esta situación súmase a falta de documentación dos asuntos sometidos ao pleno, “que non se facilita en tempo e forma ou se remite en formatos que impiden a súa correcta lectura e análise”, sinala o voceiro.

O PSdeG denuncia tamén que, desde o inicio do actual mandato, non lle consta a aprobación dun novo orzamento municipal. “Aínda que a alcaldesa sostén que as contas están prorrogadas”, o grupo socialista asegura que non recibiu a documentación solicitada sobre a prórroga, os créditos vixentes e as modificacións realizadas.

“A falta de organización e o desleixo do PP non poden impedir que a oposición fiscalice a xestión municipal. A alcaldesa ten que render contas: a información do Concello non é patrimonio do seu partido e facilitar o acceso a ela é unha obriga. A veciñanza de Triacastela merece saber como se xestionan os seus cartos, e nós imos seguir esixindo transparencia e explicacións por cada incumprimento do Goberno local”, conclúe Fernández