O Ministerio de Transportes e Mobilidade Sostenible comezou o pasado luns 5 de outubro unhas obras dirixidas a reparar noiros da N-120 coa intención de evitar que se repitan desprendementos que afecten a esta concurrida estrada. Para poder traballar en condicións de seguridade procederon ao corte dun tramo de vía entre os quilómetros 490,5 e 493,5, comprendidos entre a antiga Discoteca N-120 e o acceso de entrada a Quiroga e San Clodio.
Os labores consistirán en sanear a parte superior dun importante noiro que xa sufriu un desprendemento meses atrás, retirar toda a masa de roca mobilizada e os materiais amoreados ao pe do desmonte e, posteriormente, instalar unha pantalla dinámica de alta enerxía para evitar novos desprendementos.
As obras alongaranse, segundo previsións do Ministerio, ata o venres 4 de decembro de 2026; mais cómpre ter en conta que as condicións meteorolóxicas adversas poderán alongar o devandito prazo.
CORTE DE TRÁFICO E DESVÍO
Por mor da envergadura dos traballos, e co fin de garantir a seguridade dos traballadores e usuarios, a circulación pola N-120 estará afectada con cortes de tráfico e un desvío provisional.
Estas afectacións teñen dúas fases. Na primeira levouse a cabo un corte da N-120 entre os quilómetros 490,5 e 493,5, corte total da estrada que leva aos vehículos a desviarse pola LU-933 –que pasa por Espandariz– ata os accesos ás vilas de San Clodio e Quiroga así como á propia N-120. Na segunda fase abrirase un carril da propia N-120 no tramo do corte.
