O interese expresado durante a asemblea, xunto co trasladado por teléfono por outros socios, permite afrontar con maior optimismo unha situación marcada nos últimos meses pola ausencia dun equipo disposto a asumir esa responsabilidade. A actual Xunta Directiva e a xerencia valoran positivamente esta resposta, que abre a posibilidade de constituír, polo menos, unha candidatura.

O seguinte paso será celebrar canto antes unha reunión entre as persoas que amosaron esa disposición, co obxectivo de concretar o seu compromiso e avanzar na formación dun posible equipo directivo. A intención é convocar proximamente o proceso electoral e completar o relevo o antes posible. O calendario comunicarase aos asociados unha vez concretado.

A asemblea do xoves fora convocada como un último chamamento para abordar a continuidade do CCU, tras a xornada de traballo celebrada o pasado 15 de outubro. Naquela sesión púxose de manifesto a necesidade de obter unha resposta do colectivo ante o risco de que a falta de relevo levase á disolución da entidade.

O mandato ordinario da actual Xunta Directiva rematou en novembro de 2025 e ás eleccións convocadas en xaneiro de 2026 non se presentou ningunha candidatura. Ante esa situación, a directiva aceptou prolongar excepcionalmente a súa dedicación e, xunto coa xerencia, mantivo a actividade da asociación mentres se intentaba facilitar a transición a un novo equipo.

A disposición manifestada agora por varios socios supón un avance importante nese proceso. Aínda quedan pasos por concretar, pero o encontro abre unha perspectiva máis favorable para a continuidade do CCU. A asociación agradece a participación e o interese das persoas que responderon ao chamamento e destaca especialmente a vontade de quen está disposto a asumir novas responsabilidades.