A Confederación Intersindical Galega (CIG) convoca unha asemblea aberta en Monforte co obxectivo de informar, debater e mobilizar a clase traballadora e ao conxunto da sociedade ante a foga xeral convocada para o vindeiro 11 de novembro baixo o lema «Galiza en loita por unha vida digna».

Desde a CIG denuncian que o encarecemento do custo da vida, a dificuldade cada vez maior para acceder a unha vivenda digna, a precariedade laboral e a perda de poder adquisitivo “están deteriorando as condicións de vida das maiorías sociais. Unha realidade que afecta especialmente á clase traballadora e á mocidade, mentres os salarios non medran ao ritmo dos prezos e os beneficios empresariais continúan aumentando”.

A isto engaden o deterioro dos servizos públicos, os recortes e a falta de recursos para atender as necesidades sociais, “fronte ao incremento do gasto militar, que supón unha aposta política e económica que vai en detrimento dos investimentos necesarios para garantir dereitos e benestar”.

A folga xeral do 11 de novembro pretende ser unha resposta contundente a esta situación e unha chamada á mobilización para reclamar condicións de vida e traballo dignas, salarios que permitan vivir, acceso á vivenda, servizos públicos fortes e capacidade para decidir sobre o futuro económico e social de Galiza.

A CIG fai un chamamento á participación nesta asemblea aberta, dirixida á afiliación, ás persoas traballadoras, aos colectivos sociais e ao conxunto da cidadanía, “porque a folga xeral constrúese coa implicación e a participación de todas e todos para ser unha resposta contundente a esta situación e unha chamada á mobilización para reclamar condicións de vida e traballo dignas”, conclúe o sindicato.