O Executivo Provincial dá luz verde á aprobación desta achega económica para acometer os traballos de arranxo dun total de 6,7 quilómetros de 5 estradas provinciais no Concello de Folgoso do Courel.

As obras, que poderán comezar previsiblemente no vindeiro mes, realizaranse nas estradas LU-P-1301, LU-P-1303, LU-P-1306, LU-P-4501 e LU-P-560.

Por tramos concretar que as intervencións serán nun treito de 1,1 quilómetros da estrada LU-P-1301, que vai dende Seoane do Courel ao Hospital e ramais a Piñeira, Lousada e Vila; entre os puntos 1,4 e 2,5 ; 1,6 quilómetros da LU-P-1303, que vai dende Seoane por Visuña a Ferramulín, entre os puntos 14 e 15,6; 1 quilómetro do vial LU-P-1306, que vai dende Megoxe a Ferreira do Incio, entre o punto 2,9 e 3,9; 1 quilómetro da LU-P-4501, que vai dende Poio a Louzarela e accesos Meiraos, entre o punto 6,8 e 7,8 e 2 quilómetros da LU-P-560, que vai dende Samos ao Courel e ramal a Santa Mariña, entre os puntos 34 e 36.

Os traballos consistirán na limpeza de cunetas, rehabilitación do firme con aglomerado en quente e incremento da seguridade vial coa renovación da sinalización horizontal e vertical.