A cafetería do Complexo Deportivo da Pinguela comezou xa a prestar servizo ás persoas usuarias da Piscina Municipal, Pavillón Polideportivo e Ximnasio Municipal, e tamén ao público xeral. Deste xeito, lembran dende o Equipo de Goberno, “o acceso á instalación é libre e aberto a toda á cidadanía”.

A primeira xornada de actividade, este sábado 7 de novembro, contou coa visita do Equipo de Goberno e rexistrou unha importante participación de público.

A INSTALACIÓN

A instalación, completamente renovada, dispón dun espazo de 105 metros cadrados, con barra, mobiliario interior e unha ampla cristaleira con vistas ás piscinas. A súa apertura permite completar os servizos que ofrece o Complexo Deportivo da Pinguela, que reúne nunha mesma infraestrutura a Piscina Municipal, o Pavillón Polideportivo e o Ximnasio Municipal.

Ademais dunha ampla variedade de bebidas quentes e frías, snacks e bocadillos, haberá un espazo corner tipo ‘self service’ para un servizo sen esperas. Coa apertura deste novo espazo búscase tamén, como na etapa anterior á reforma das instalacións, que a cafetería sexa un lugar de “ambiente familiar e trato amable”.

A cafetería funcionará de xaneiro a decembro, co seguinte horario:

De luns a venres: de 8.00 a 13.00 horas e de 16.00 a 21.00 horas. o Sábados: de 10.00 a 14.00 horas e de 16.00 a 22.00 horas. Domingos e festivos: de 10.30 a 14.30 horas.

Ademais, o horario adaptarase ás necesidades derivadas da celebración de competicións e torneos deportivos que teñan lugar no Complexo Deportivo da Pinguela, co obxectivo de ofrecer servizo ás persoas deportistas e ao público asistente a estes eventos.