O movemento Vilas en Flor, promovido pola Fundación Juana de Vega, celebrou este venres en Salceda de Caselas, a entrega destes galardóns que recoñecen as boas prácticas ambientais nos municipios de menos de 40.000 habitantes. O Concello de Chantada obtivo por noveno ano consecutivo o recoñecemento de “4 Flores de Honra”, a máxima distinción entregada ata o momento por Vilas en Flor.
Nesta edición participaron 40 municipios e o Concello de Chantada volveu a ser dos máis premiados. Na provincia de Lugo, só os concellos de Sarria e Chantada participan do programa Vilas en Flor.
O alcalde de Chantada, Manuel Lorenzo Varela, que acudiu acompañado por unha representación da Área de Parques e Xardíns, co concelleiro, Diego Otero e Modesto Varela encargado do equipo de Xardinaría; recolleu a distinción de mans de Enrique Luis de Salvador, director do Instituto de Estudos do Territorio da Xunta de Galicia.
No recoñecemento de Chantada, o xurado destacou a recuperación de prazas e espazos verdes, como a humanización da praza Luis García Arias ou o traballo de posta en valor no barrio de Marín.
Ademais de espazos que sempre valorou o xurado como o Paseo Fluvial e o Parque Eloísa Rivadulla, nesta ocasión recoñecéronse tamén proxectos nos que se está traballando como o das rúas Pardo Bazán e Concepción Arenal nas que se conxuga a mellora urbanística coa dotación de novas zonas verdes.
Vilas en Flor premio Chantada / Concello de Chantada
O xurado recoñece a composición das xardineiras, diferentes en cada rúa mesturando plantas de tempada con plantas arbustivas que duran todo o ano e tamén a decoración de espazos que fan esquina e entre rúas.
O alcalde do Concello de Chantada, Manuel Lorenzo Varela, asegura estar moi satisfeito por revalidar este recoñecemento, “o certame é cada vez máis esixente e estamos moi contentos destas 4 Flores de Honra, froito das xestións e do traballo das brigadas e dos diferentes servizos. Temos a mesma ilusión que o primeiro día e para as próximas edicións seguiremos creando e mellorando espazos públicos nas parroquias e na vila”.
O rexedor agradece o labor do equipo de Parques e Xardíns para crear espazos máis agradables, “diversificáronse as obras que presentamos a Vilas en Flor. Apostamos por recuperar e adaptar o mobiliario ás distintas zonas con madeira, noutros casos consérvase a forxa ou utilizamos material reciclado para contribuir á sostibilidade. E todo adecuado á contorna”.
As Vilas en Flor son os municipios que traballan para a mellora do espazo urbano e a calidade de vida da súa poboación. Este sistema reflicte o nivel de desenvolvemento das actuacións en espazos verdes e pon en valor o traballo realizado durante o ano en curso. Para o certame a Fundación Juana de Vega conta co apoio de Asvinor (Asociación de empresarios viveiristas do noroeste) e Agaexar (Asociación Galega de Empresas de Xardinería)
Vilas en Flor premio Chantada / Concello de Chantada
