Os concelleiros do Grupo Municipal do PP de Monforte anuncian que non participarán nos actos organizados polo goberno local polo 25N xa que “a loita contra a violencia cara ás mulleres esixe compromiso, coherencia e exemplaridade todos os días do ano, algo que non están a demostrar dende o goberno local”.
A voceira popular asegura que tres mulleres prestaron declaración ante o xuíz en relación cos feitos denunciados e considera que esta situación esixe unha reflexión sobre a responsabilidade de quen representa á institución municipal, “investigación xudicial non está pechada e a Fiscalía Provincial apreciou a existencia de dúbidas sobre se as condutas denunciadas podían ser constitutivas de delitos contra a liberdade e a dignidade das persoas”.
A este respecto, os populares defenderán no vindeiro pleno unha moción con motivo do Día Internacional da Eliminación da Violencia contra as Mulleres para reforzar a concienciación social e reivindicar a necesidade de combater todas as formas de violencia, “pero tamén de evitar calquera tipo de dobre discurso nesta materia. O compromiso coas mulleres demóstrase tamén coas decisións políticas, coa defensa da súa dignidade e coa esixencia de responsabilidades cando xorden situacións que poden comprometer a credibilidade das institucións”, explica Katy Varela.
De cara á cita do 29N, os populares de Monforte apelan á necesidade de apostar por outra forma de facer política, baseada na responsabilidade, no respecto ás persoas e na defensa dos valores democráticos, “un proxecto que ten en Núñez Feijóo un referente nacional e que aspira a recuperar a confianza dos cidadáns cunha política de feitos, compromiso e respecto ás institucións”.

