Un incendio rexistrado nunha vivenda da rúa Miguel de Cervantes de Escairón, no Concello do Saviñao, e do que ninguén resultou ferido, quedou xa controlado, segundo informa o 112.

Un veciño da localidade foi o que se puxo en contacto co servizo de emerxencias para alertar sobre o fume que vía saíndo polas xanelas da casa. Os bombeiros de Chantada acudiron para sufocalo e indicaron que as chamas afectaron ao baixo e ao primeiro andar do inmoble.

Entre as hipóteses que se barallan pénsase que o incendio produciuse por mor dunha cheminea, que ademais propagou o lume.

Os bombeiros traballaron no lugar do sinistro coa colaboración dos voluntarios de Protección Civil do Saviñao e os axentes da Garda Civil, que tamén foron alertados polo 112.