Os candidatos do Partido Popular por Lugo ao Senado, José Manuel Barreiro e Manuel Varela, e ao Congreso, Jaime de Olano, ratificaron este luns diante dos empresarios/as de Chantada que seguirán demandando a autovía a Ourense. Neste encontro, Varela manifestou que “é un tema que non vou deixar de lado”.
Segundo os populares, esta infraestrutura que comezaba a camiñar coa fixación incluso de prazos para rematar algúns treitos, quedou apartada nos orzamentos estatais que intentou sacar adiante, sen éxito, Pedro Sánchez. Esta situación, insisten dende o partido popular, é un claro ”castigo” que chega tras a moción de censura de Pedro Sánchez.
Neste contexto, no que se lles trasladaba aos empresarios de Chantada o compromiso de non esquecer a autovía a Ourense, o propio Varela lembrou as moitas reunións mantidas co presidente da Xunta, Alberto Núñez Feijóo, coa ex ministra Ana Pastor, e co cabeza de lista ao Senado, José Manuel Barreiro, para sacala adiante.
E tendo a culpa do esquecemento desta infraestrutura a moción de censura socialista, velaquí un motivo máis ao que se agarra Manuel Varela para xustificar que “cando me propuxeron voltar ao PP e ir ao Senado, vin nesta opción unha oportunidade para ser a voz dos chantadinos e reclamar entre outras actuacións esta autovía, sen esquecerme tamén da N-540”.
