O orzamento medra na provincia nun 11% con respecto ao 2018, e os 17 Concellos Emprendedores, que tiveron prioridade á hora de acceder a estes apoios, logran o dobre de contratos que os municipios que non contan con este distintivo autonómico que busca favorecer a actividade industrial na Comunidade.
Os Concellos Emprendores son Taboada, Quiroga e Ribas de Sil, cadaún con dous traballadores e unha subvención de 26.300 euros; Folgoso do Courel con 3 traballadores e unha subvención de 39.450 euros; O Saviñao con 4 traballadores e 50.179 euros de subvención e Monforte, tamén con 4 traballadores e 52.600 euros de subvención.
Os desempregados poderán contratarse para o desenvolvemento de actividades de silvicultura, limpeza de montes, a xestión da biomasa, a valorización forestal ou a planificación preventiva. O obxectivo é proporcionar ás persoas sen traballo que habitan nos concellos rurais de Galicia, unha experiencia práctica e profesional necesaria para facilitar a súa inserción no mercado de traballo.
A Administración Autonómica mellorou este ano esta iniciativa, eliminando os límites de contratación por concello e incentivando con máis contratos ás localidades fusionadas e ás adheridas ao protocolo de Concellos Emprendedores. Tiveron prioridade os municipios con maior superficie forestal. Aumentouse, ademais, a contía media por traballador, que este ano se sitúa nos 13.176 euros, preto dun 20% máis que o exercicio anterior.
Aprol Rural forma parte dunha medida activa de emprego dirixida á mellora da ocupabilidade das persoas sen un posto laboral. Os traballadores e traballadoras que se contraten terán que estar inscritos no Servizo Público de Emprego de Galicia (SPEG) e a duración dos contratos será de 9 meses e a tempo completo.
Lugo foi a provincia galega na que máis baixou o desemprego no último mes e no último ano. En marzo, 346 lucenses atoparon emprego e hai 1.688 desempregados menos que hai un ano. Segundo a administración autonómica, o desemprego caeu en colectivos prioritarios para a Xunta, como os menores de 30 anos e parados de longa duración.
