Os organizadores, simpatizantes monfortinos/as da República en gran medida, puxeron a mesa coa urna na Rúa Cardeal de Monforte e alí estiveron este 13 de abril das 9:00 ás 14:00 h. Durante ese tempo recolleron os votos simbólicos da xente que quixo participar nesta consulta informal sobre a forma de goberno preferida para o Estado Español.
Nas papeletas preguntábase, por unha banda, se o votante estaba a favor dun referendo vinculante sobre o modelo de estado e, por outra banda, de contestar SI pedíase un pronunciamento sobre a opción escollida para España, República ou Monarquía.
Emitíronse un total de 389 votos e 350 deles foron a favor da República, co cal case un 90% dos participantes rexeitaron con este pronunciamento a actual monarquía. Non se pediron datos persoais a ningún dos participantes e durante o proceso non houbo ningún tipo de incidencia.
Co resultado obtido neste referendo simbólico, a imitación doutros xa celebrados con anterioridade a nivel nacional sobre a mesma temática, a celebración de mañá conmemorando a proclamación da II República terá un aliciente máis, saber que moitos/as monfortinos votaron República.
Máis información dos motivos desta particular iniciativa nun artigo anterior de Xornal de Lemos.
