A Covid avanza: Lugo suma 88 contaxios máis e 4 novas hospitalizacións

Dous dos ingresos en UCI resultan de traslados do Hospital de Ferrol ao Lucus Augusti polo aumento da presión hospitalaria no primeiro.

Unha sanitaria, antes de realizar un test de coronavirus no Hospital Público da Mariña. EFE/ELISEO TRIGO

A área sanitaria de Lugo segue aumentando os casos de Covid entre a súa poboación a un ritmo sostido. Se ben na xornada anterior se sobrepasaba de novo o limiar dos 1.000 ata os 1.031, este domingo a provincia de Lugo alcanza os 1.098 contaxios activos, segundo o reconto ofrecido polo Servizo Galego de Saúde (Sergas). Desta maneira, nas últimas 24 horas confirmáronse un total de 88 novos contaxios a través da proba PCR. Isto implica un aumento de 4 casos con respecto aos rexistrados o día anterior, cando se detectaron 84.

A situación nos hospitais tamén se mantén á alza. Das 1.098 persoas contaxiadas, 37 atópanse en unidades de hospitalización, de maneira que dúas persoas máis foron ingresadas nas últimas 24 horas. Tamén se incrementa o número de persoas que se atopan en coidados intensivos: se na xornada anterior se contaban catro – todos eles no C.H.U. de Lugo -, este domingo rexístranse seis. Estas dúas persoas foron trasladadas dende o Hospital de Ferrol ao Lucus Augusti polo aumento da presión hospitalaria no primeiro.

O reparto por hospitais queda, pois, do seguinte xeito: o Hospital Público da Mariña atende 13 pacientes infectados – 1 menos -, o C.H.U. de Lugo conta con 19 – tres máis, e entre eles, os seis en coidados intensivos –, e o Hospital de Monforte rexistra cinco pacientes – sen cambios –. En total son 43 hospitalizados.

No histórico da provincia documéntanse 151 falecidos, 7.009 altas e 8.264 casos acumulados dende o inicio da pandemia. Fixéronse, ademais, un total de 140.146 probas PCR.

CASE 60 HOSPITALIZACIÓNS EN GALICIA

Galicia sumou outros 58 hospitalizados con coronavirus nunha xornada na que os positivos detectados por proba PCR volven estar en máximos da pandemia. Os 1.124 casos diagnosticados supoñen a segunda cifra máis alta ata a data, só superada polos positivos do sábado, día no que se realizaron unhas 600 probas máis que as practicadas nas últimas 24 horas.

DEIXAR UN COMENTARIO

Please enter your comment!
Please enter your name here