O Xulgado do Penal número 1 de Lugo acolle este xoves, día 19 de decembro, o xuízo contra un veciño da parroquia de Axulfe, en Chantada, acusado dun delito de malos tratos animais por deixar morrer a 39 reses da súa granxa por falta de alimentación.

A fiscalía pide 14 meses de cárcere e inhabilitación especial para a comercialización e tenencia de animais durante tres anos, segundo informou o avogado da acusación particular, Víctor Valladares, nun comunicado remitido aos medios.

Precisamente, a acusación popular, que representa a tres santuarios de animais e a un particular, eleva a petición a 18 meses de prisión e a catro de inhabilitación especial para a comercialización e a tenencia de animais durante catro anos.

Conforme lembrou o letrado, os feitos ocorreron en abril de 2016, cando a Garda Civil descubriu ás 39 reses falecidas nunha explotación gandeira por falta de alimentación. Ademais, os axentes atoparon varias decenas de animais en estado de inanición, polo que posteriormente tiveron que ser sacrificadas.

Segundo explica o comunicado, por parte da defensa do acusado alégase a existencia dunha bacteria contaminante no silo que contiña o penso das reses, así como unha situación económica e mental complicada.

Con todo, sinala que diferentes organismos que redactaron con posterioridade os informes testemuñan a existencia dunha falta de alimentación e hixiene alarmante, que chegaba ata o medio metro de xurro, sen que constase a existencia de bacteria ningunha no silo.

O xuízo terá lugar o 19 de decembro ás 11,15 horas no Xulgado do Penal número 1 de Lugo, ao que foron chamados a declarar tanto o acusado como unha das denunciantes e as testemuñas (axentes da Garda Civil e veterinarios).