O tradicional Folión de Carros de Chantada celebrarase este ano o 27 de agosto. Para anuncialo, a Asociación Cultural Amigos do Folión busca en cada edición que o cartel represente os trazos máis importantes deste evento etnográfico.

Con esta intención, neste 2022 a entidade acordou co IES Val do Asma que sexa o alumnado deste centro educativo quen se encargue de deseñar o cartel que anuncie o ‘Folión de Carros 2022’. Os traballos de creación da obra artística están coordinados pola profesora de debuxo, Lola López, e cada alumna e alumno participantes recibirán como recoñecemento un vale para mercar material educativo en comercios de Chantada.

O alumnado do IES Val do Asma recibe este encargo por entender a entidade organizadora que “nos últimos anos teñen demostrado un gran compromiso” co Folión de Carros “colaborando en todo aquilo que se lle pediu”. A asociación confía tamén que a proposta gráfica que presenten para o cartel anunciador “amosará o sentir da xente con relación a todo o que representa esta festa para veciños e veciñas”.