A Área de Cultura xestionou o calendario do ‘Circuíto de teatro afeccionado’ atendendo á dispoñibilidade das compañías e ás preferencias dos concellos e asociacións interesadas, e financia integramente as actuacións.
A vicepresidenta da Deputación de Lugo, Maite Ferreiro, tras reunirse con representantes das compañías que participan no circuíto, agradeceu “a súa implicación e colaboración para sacar adiante esta programación” e valorou “a participación de dez compañías máis que na última edición, como unha confirmación da volta á normalidade no ámbito do teatro afeccionado, unha rede creativa que é importante non só polo seu traballo na escena se non tamén por canalizar a creatividade e as inquedanzas artísticas e culturais de persoas de distintas xeneracións”.
O Circuíto e Teatro Afeccionado artéllase en catro ciclos en función das temáticas e públicos das obras propostas polas compañías, entre as que se atopan traxicomedias de intriga nas que o suspense se adereza con humor negro; funcións que abordan, a través de historias cotiás, problemáticas sociais como a desigualdade de xénero ou pezas cómicas e costumistas nas que os protagonistas son arquetipos sociais, pasando por adaptacións de obras clásicas da literatura.
No sur de Lugo as compañías participantes son as seguintes: Teatreiras e Viraventos de Monforte de Lemos, Argalleiras de Chantada, e Rebuldeira de Sarria.
