Unha muller foi rescatada este xoves tras caer por un terraplén no municipio lucense de Chantada. Segundo informou o 112, a ferida presentaba un brazo roto, arañazos na cara e a luxación dun dedo. Por iso, foi evacuada ao Hospital de Monforte, despois de que fose rescatada polos Bombeiros de Chantada.

Un particular chamou ao servizo pasadas as 11.00 horas e explicou que a muller caera por un terraplén en Pincelo, Nogueira de Miño, en Chantada. Avanzaba que tiña unha importante lesión nun brazo, e que serían necesarios medios para subir a ferida desde o fondo do terraplén ata a ambulancia.

Deste xeito, os xestores do Centro Integrado de Atención ás Emerxencias de Galicia pediron a colaboración dos efectivos do parque comarcal de Chantada, así como dos profesionais de Urxencias Sanitarias de Galicia-061 e dos axentes da Policía Local. Pola súa banda, os bombeiros lograron o rescate e a ferida foi evacuada ao Hospital de Monforte por unha dotación de Urxencias Sanitarias de Galicia-061.