Alumnado do CPI Poeta Uxío Novoneyra – no Folgoso do Courel -, da man da súa profesora de Bioloxía, Lourdes G. Sotelo, conseguiu gravar a diversa vida animal da serra do Courel no marco dun traballo sobre a fauna que desenvolveron co apoio do programa de educación ambiental Voz Natura.
Nestas gravacións, capturadas durante o ano 2021 e 2022, poden observarse paxaros como o ferreiriño negro ou o gaio, morcegos, esquíos, corzos, xabarís coas súas crías, xenetas, gatos montés… E mesmo un exemplar novo de oso pardo.
O alumnado do colexio utiliza para estes proxectos cámaras de fototrampeo, que permitiron gravar un total de 15 especies entre mamíferos e aves. Unha mostra da riqueza faunística das serras galegas.
