O xornalista Carlos Julio González, creador de Diario de Quiroga, vén de facer público a través das súas redes sociais que cesa a actividade informativa “do seu blog”, un auténtico e recoñecido medio de comunicación por moito que el, dentro da súa humildade, se resistise a consideralo como tal.
A andaina de Diario de Quiroga comezou no ano 2018, cando Carlos Julio contaba con tan só 15 anos, e dende aquela foi quen de publicar máis de 2.700 pezas informativas, superando as 860.000 páxinas vistas, con entradas ao dixital dende unha chea de países e unha notoriedade no sur de Lugo digna de admirar. Chegou a ser o medio de referencia na comarca, e así o acredita por exemplo unha anécdota persoal que nos conta o seu creador. Foi na Ponte de Barxa de Lor, na Pobra do Brollón. “Estabamos gravando alí un spot do QuiRoma, creo que no 2019, e un señor díxonos que era unha mágoa que a ponte estivese chea de maleza, e que había que avisar a Diario de Quiroga”. E engade, “era un señor que non me tiña pinta de ter acceso a internet e ademais cría que era o sitio onde enviar esa queixa”.
Xornal de Lemos pode chufar que foi quizais o primeiro medio de comunicación que se interesou polo seu labor, publicando no 2019 unha completa entrevista na que se debulla o talento precoz deste quirogués como responsable e creador de Diario de Quiroga. Esta peza foi, ademais, unha das máis lidas ese ano.
Na súa emocionada despedida en redes sociais, Carlos Julio referíase ao nacemento do medio, “creei este blog como un pasatempo e, como digo sempre, a cousa foise de mans no bo sentido”; comentaba a experiencia e a satisfacción destes anos como redactor, “no persoal, serviume como unha aprendizaxe constante que nunca esquecerei. Se, ademais diso, os contidos foron de utilidade para alguén, doume por satisfeito“; pedía desculpas “aproveito para pedir desculpas polos erros cometidos, que seguro que non foron poucos, pero nunca con mala fe”, e remataba cun agradecemento “a todas as persoas, algunhas dende moi lonxe, que confiaron neste blog para seguir o día a día da comarca. Tamén a todos aqueles que fixeron chegar informacións, fotos, suxestións…“.
“creei este blog como un pasatempo e, como digo sempre, a cousa foise de mans no bo sentido”
FIN DE CICLO E AGRADECEMENTOS
En palabras de Carlos, no seu post de despedida, “a vida son etapas e chegou o momento de pechar esta, que foi marabillosa”. Preguntámoslle pola toma de decisión e recoñece con sinceridade que ultimamente estaba facéndoselle un pouco complicado compaxinalo con outras cousas e “prefería darlle unha morte digna que telo aí agonizando”.
“a vida son etapas e chegou o momento de pechar esta, que foi marabillosa”
“Nestas últimas semanas preguntoume bastante xente que pasaba porque estaba o xornal moi parado”, comenta tamén Carlos Julio dando xa a entender que era o momento… Non poder atendelo como lle gustaría, coa esixencia informativa do día a día, acabou de convencelo para aparcar esta aventura.
Entre as satisfaccións que tivo estes anos, Carlos quédase con ter sido o medio oficial do Quiroga Trail Challenge durante dous anos, un tema que lle fixo sempre moita ilusión xunto con levar o logotipo de DQ nos dorsais dunha das distancias. E tamén ese logo foi empregado nos pantalóns do Covirán, equipo de fútbol sala de Quiroga, e polo propio equipo de fútbol de Quiroga que o poñía tamén nos partidos.
