A concentración tivo lugar na entrada da aldea de Seoane e déronse alí encontro máis dun cento de persoas, entre pais, nais, nenos e veciños que se sumaron á protesta. Os contínuos cortes do tráfico, o estado dos roteiros de desvío e os retrasos na finalización da obra están a afectar aos transportes escolares dende hai case dous anos.

O estado da estrada está tamén a afectar a toda a veciñanza e aos negocios locais. “Levamos dous anos convivindo con estas obras, que aínda non remataron, a pesar de que a obra a realizar afecta a pouco menos de tres quilómetros de estrada”.

Ademais das dificultades diarias dos transportes escolares para pasar polo tramo afectado, lembran que hai uns días produciuse un desprendemento a consecuencia dos traballos que se están a realizar e pechouse a estrada durante varios días, “agravando a xa precaria situación en que os nenos teñen que viaxar ao colexio”.