Quiroga lembra o seu pasado romano con dúas festas

O 20 de agosto celébrase en Margaride do Lor a ‘Festa do Ouro’ e no núcleo urbano de Quiroga o ‘Qui-Roma’.

Romanos na praza do Auditorio. Foto: Qui-Roma (arquivo)

Margaride de Lor, localidade de Quiroga que conserva vestixios romanos e  destaca polas súas coñecidas galerías dunha antiga mina de ouro, celebra este ano a súa X Festa do Ouro. Neste encontro co seu pasado romano, destaca a ambientación romana e castrexa e un programa de carácter festivo e cultural.

Despois do parón da pandemia, a Asociación de Veciños e Veciñas de Margaride retoma a celebración neste 2022 e convida a participar dunha completa xornada cultural que terá lugar o 20 de agosto.

PROGRAMA

Ás 11:00 h. haberá unha misa en latín, a continuación procederase a visitar  as adegas –nas galerías da antiga mina de ouro– acompañados de gaiteiros e xa ás 14:00 h. farase o xantar no campamento castrexo-romano.

Pola tarde, ás 18:00 h. haberá xogos entre castrexos e romanos nos que se poderá participar xogando á Chave e os máis pequenos realizarán unha actividade de aventura baixo o nome de “na busca do ouro”.

Ás 21:00 h. comezará a festa, ás 22:00 h. terá lugar a cea e a continuación está programada unha ‘Nox Terrorem’ con rituais celtas, ‘rumoris fabulam veri’ (lendas e fábulas) e queimada.

E como remate da xornada, a partir das 00:00 h. Verbena.

Programa ‘Festa do Ouro’ 2022

QUI-ROMA

Paralelamente, este mesmo día e no núcleo urbano de Quiroga, terá lugar outra celebración romana, neste caso cun carácter máis festivo e de entretemento. Trátase do Qui-Roma, un evento que chega este ano á súa VII edición e que vén de presentar un amplo programa de actividades para todos os públicos. O epicentro das mesmas será a Praza do Auditorio, onde o albergue municipal.

Pola mañá haberá unha ruta de cabalos, un mercado Qui-Romano na Praza do Auditorio e varios obradoiros para os máis pequenos. Tamén, en horario de mañá, ambientación musical no recinto con formacións tradicionais e charangas e demostración de ‘Fiado Tradicional’ con exposición de traballos no Museo Etnográfico de Quiroga.

Dous quirogueses caracterizados e gozando da festa / XdL

Ás 11:30 h. desfile romano pola Vía Rex –Rúa Real– a cargo da Guardia Lucus Equites, con remate exhibición ao rematar na Praza do Auditorio, e paseo en burros para nenos e nenas ás 12:30 h.

Pola tarde poderanse ver, como noutras edicións, os espectaculares bois de Mario Nogueira, e de 17:00 a 19:00 h. a cativada terá xogos con auga que coordinará Inés de Vaijapi.

Bois de Mario Nogueira. Foto: Fernando Berani

Seguindo a tarde, máis entretemento para público familiar coa escola de pequenos gladiadores Qui-Romanos, e un espectáculo circense no anfiteatro da Praza do Auditorio a cargo de Jano –ás 19:00 h.–.

Entrando na noite, ambientación e animación con batukada e desfile Qui-Romano ‘Arde-Loucos’ pola rúa Real de Quiroga no que tamén participarán os bois de Mario Nogueira.

Para a noite queda o espectáculo-recreación de loita de gladiadores contra castrexos –21:00 h.–, batukada e o concerto do grupo monfortino Malenne ás 23:00 h. Rematada a actuación deste grupo a festa continuará coa música dun DJ.

Gladiadores no anfiteatro da praza do Auditorio. Foto: Qui-Roma

DEIXAR UN COMENTARIO

Please enter your comment!
Please enter your name here